മഹാമാരി

മഹാമാരി  - മരണത്തെ ആരും കൈ നീട്ടി വാങ്ങാന്‍ ആഗ്രഹിക്കുന്നില്ല.  വിദ്യാഭ്യാസ മേഖലയിലും ആരോഗ്യ മേഖലയിലും മുന്നിട്ടു നില്‍ക്കുന്ന കേരളീയന്‍റെ ജീവിതം പല കാരണങ്ങള്‍ കൊണ്ടും ദുസഹമാണെന്നാണ് വയ്പ്.  ലോകത്ത് ആരോഗ്യ മേഖലയിലും വിദ്യാഭ്യാസ മേഖലയിലും മുന്നിട്ടു നില്‍ക്കുന്ന ഏതു ജനവാസമുള്ള രാജ്യങ്ങളിലായാലും കേരളത്തിലെ അത്ര റോഡപകടങ്ങള്‍ ഉണ്ടാവില്ല.  അതായത് റോഡ് നിയമങ്ങളെ നോക്കുകുത്തിയായി പെറ്റുപെരുകുന്ന റോഡപകടങ്ങള്‍ ഇത്രയും ചെറിയ ഒരു ഭൂപ്രദേശത്ത് കാണുവാന്‍ കഴിയുകയില്ല. അത്രമാത്രം റോഡപകടങ്ങളാണ് കേരളീയന്‍ അഭിമുഖീകരിക്കുന്നത്. 

സ്വന്തം പുരയിടങ്ങള്‍ വൃത്തിയായി സൂക്ഷിക്കുന്ന കേരളീയന്‍ പക്ഷെ പൊതുവിടങ്ങളില്‍ വിസര്‍ജ്യങ്ങള്‍ നിക്ഷേപിക്കുന്നതില്‍ അമാന്തം കാണിക്കാറില്ല. പെറ്റുപെരുകുന്ന കൊതുകുകള്‍ വരുത്തി വയ്ക്കുന്ന പകര്‍ച്ച വ്യാധികള്‍ മൂലമുള്ള മരണമായാലും വൃത്തിഹീനമായ അന്തരീക്ഷം വരുത്തിവക്കുന്ന ആരോഗ്യ പ്രശ്നങ്ങളായാലും കേരളത്തിലെ പോലെ ആരോഗ്യമേഖലയില്‍ മുന്നിട്ടു നില്‍ക്കുന്ന ഒരു ജനതതിക്കു നേരിടേണ്ടി വന്നിട്ടില്ല.  മദ്യപാനം മൂലം കേരളത്തിലെ കൊലപാതകങ്ങളും സാമൂഹ്യമായ ദുരവസ്ഥകളും ദിവസേനയെന്നോണം പെറ്റുപെരുകുകയാണ്. ആഹാര സാധനങ്ങളില്‍ വിഷലിപ്തമായവ കൊണ്ടുണ്ടാവുന്ന മാറാവ്യാധികള്‍ മൂലമുണ്ടാകുന്ന മരണങ്ങളും കുറവല്ല. രാഷ്ട്രീയ കൊലപാതകങ്ങളും മതവൈരാഗ്യങ്ങളും കേരളത്തില്‍ നലനില്‍ക്കുന്നു.  അംഗവൈകുല്ല്യങ്ങള്‍ മൂലമുള്ള ദുരവസ്ഥ അനുഭവിക്കുന്നവര്‍ ഒട്ടും കുറവല്ല.  ചുരുക്കത്തില്‍ മരണത്തെ കൈനീട്ടി വാങ്ങാന്‍ ആരും ആഗ്രഹിക്കാറില്ലെങ്കിലും കേരളീയന്‍റെ വാസം അസമാധാനത്തോടെയും മരണത്തെ മുഖാമുഖം കണ്ടുകൊണ്ടുമാണ്.   

യാത്ര പോകുമ്പോഴുള്ള അവസ്ഥയില്‍ തന്നെ തിരിച്ചു വരുമോ എന്നുള്ള ആത്മവിശ്വാസത്തോടെ ജീവിക്കുവാന്‍ കഴിയാത്ത അവസ്ഥ കേരളത്തില്‍ നിലനില്‍ക്കുന്നു.  ഇത് യുദ്ധമേഖലയില്‍ ജീവിക്കുന്ന പോലെയൊ ആഭ്യന്തരയുദ്ധ അവസ്ഥയില്‍ ജീവിക്കുന്നതു പോലെയൊ സമാനമായ അവസ്ഥയാണ്.   നിലനില്‍ക്കുന്ന ദുരവസ്ഥ മൂലമുണ്ടാകുന്ന കേരളത്തിലെ മരണനിരക്ക് മറ്റിതര രാജ്യങ്ങളില്‍ കോവിഡ് മൂലമുള്ള മരണ നിരക്കിനെ വെല്ലുവിളിക്കുന്നതാണ്.

ഇത്തരം ഏറ്റവും കൂടിയ ദുരവസ്ഥ കേരളത്തിനു സമ്മാനിച്ച നമ്മുടെ ഭരണ നേതൃത്വങ്ങള്‍ പക്ഷെ മഹാമാരിയായ കേവിഡ്19 നെതിരെ ജാഗ്രത വളര്‍ത്തുന്നതില്‍ വിജയം വരിച്ചിട്ടുണ്ട്.    നിശ്ചിത സമയം ശബ്ദമുണ്ടാക്കിയും നിശ്ചിത സമയം പ്രകാശം തെളിയിച്ചും അടിയന്തരാവസ്ഥക്കു സമാനമായ പോലീസ്രാജ് നടപ്പിലാക്കിയും സാമ്പത്തീക പ്രതിസന്ധികള്‍ക്കിടയിലും പരസ്യ കോലാഹലങ്ങള്‍ക്കായി കോടികള്‍ ചിലവഴിച്ചും കോവിഡ്19നെതിരെ ജാഗ്രതയും പ്രതിരോധവും തീര്‍ക്കാന്‍ കേരളത്തിന് കഴിഞ്ഞിട്ടുണ്ട്.  ഉപ്പു തൊട്ടു കര്‍പ്പൂരം വരെ കേരളത്തിനു പുറത്തു നിന്നും വരേണ്ടതായിട്ടുള്ള കേരളീയന് അന്യദേശക്കാരനേയും പ്രവാസികളേയും അകറ്റി നിര്‍ത്താനാവാത്ത അവസ്ഥയിലും ഈ മഹാമാരിയെ പ്രതിരോധിക്കാന്‍ കഴിയട്ടെ എന്നാശിക്കാം.

          എസ്.കാച്ചപ്പിള്ളി